பேரிடர் நிவாரண நிதியிலிருந்து ரூபாய் 5000 கோடி தொகையை கேரள அரசுக்கு வழங்கிடுக: மத்திய அரசுக்கு திருமாவளவன் வலியுறுத்தல்

0
1

கேரளாவைப் பேரிடரால் பாதிக்கப்பட்ட மாநிலமாக அறிவிப்பதுடன், உடனடியாக பேரிடர் நிவாரண நிதியிலிருந்து ரூபாய் 5000 கோடி தொகையை முதல் தவணையாக கேரள அரசுக்கு மத்திய அரசு வழங்க வேண்டும் என்று விசிக தலைவர் திருமாவளவன் வலியுறுத்தியுள்ளார்.

இது தொடர்பாக அவர் வெளியிட்ட அறிக்கையில், ”கேரளாவில் இடைவிடாது பெய்யும் மழையின் காரணாமாக வரலாறு காணாத வெள்ளப்பெருக்கு ஏற்பட்டுள்ளது. இடுக்கி, பாலக்காடு உள்ளிட்ட 11 மாவட்டங்கள் தண்ணீரில் மூழ்கியுள்ளன. இதுவரை சுமார் 40 பேர் உயிரிழந்திருப்பதாகத் தெரிய வந்துள்ளது. பல்லாயிரக்கணக்கானோர் முகாம்களில் தங்க வைக்கப்பட்டுள்ளனர். வெள்ளத்தால் பாதிக்கப்பட்டுள்ள கேரள மக்களுக்கு உதவ வேண்டியது மனிதநேயமுள்ள ஒவ்வொருவரின் கடமையுமாகும். இந்தப் பேரிடர் பாதிப்பு சூழலில் மத்திய அரசு காலம் தாழ்த்தாமல் தேவையான உதவிகளை கேரள அரசுக்கு உடனடியாக வழங்க வேண்டும்.

கேரளாவில் பெய்து வரும் கனமழையால் இடுக்கி அணை உட்பட மாநிலத்தில் உள்ள 27 அணைகளும் நிரம்பிவிட்டன. அவற்றிலிருந்து தண்ணீர் திறந்துவிடப்படுவதால் வெள்ளப்பெருக்கு அதிகரித்து வருகிறது. நிலச்சரிவு ஏற்பட்டு பல்லாயிரக்கணக்கானோர் வீடுகளை இழந்துள்ளனர். இந்நிலையில் அண்டை மாநில அரசுகளும் தனிநபர்களும் கேரள அரசுக்கு உதவி செய்து வருகின்றனர். தமிழக அரசு ரூபாய் 5 கோடி அளித்துள்ளது. ஆனால், மத்திய அரசு இன்னும் நிவாரணத் தொகை எதையும் அறிவிக்கவில்லை.

ஓக்கி புயல் தாக்கிய போது பாராமுகமாக இருந்தது போல இப்போதும் மத்திய அரசு இருந்துவிடக்கூடாது. கேரளாவைப் பேரிடரால் பாதிக்கப்பட்ட மாநிலமாக அறிவிப்பதுடன், உடனடியாக பேரிடர் நிவாரண நிதியிலிருந்து ரூபாய் 5000 கோடி தொகையை முதல் தவணையாக கேரள அரசுக்கு வழங்க வேண்டுமென வலியுறுத்துகிறோம்.

கேரளாவுக்கு ரூ.5 கோடி உடனடியாக நிதியுதவி அளித்த தமிழக முதல்வருக்கு நன்றியையும் பாராட்டுகளையும் தெரிவித்துக் கொள்கிறோம்” என்று திருமாவளவன் கூறியுள்ளார்.